California

Pov Npav Tias YES (YOG) rau Nqe Lus Proposition 50 txhawm rau muab kev pom zoo cov ciam cheeb tsam kev xaiv tsa tshiab thiab muab lwm txoj hau kev rau cov niam txiv pej xeem hauv California los tawm tsam tsoom fwv Trump txoj kev tswj hwm. 

Txij ntua li thawj hnub los, cov niam txiv pej xeem hauv California yeej yog cov ntaus thawj ntxhias rau kev tiv thaiv peb cov zej zog uas raug kev tawm tsam los ntawm tsoom hwv Trump txoj kev tswj hwm thiab nws lu phav kas moos MAGA Republicans.Nrog Nqe Lus Proposition 50, cov neeg pov npav hauv California yuav tau txais dua ib lub hwv tsam los tawm tsam rau phav kas moos Republican qhov kev txiav nyiaj pab rau kev kho mob, kev ua rau tej nqi noj haus nce siab tuaj vim kev nce nqi se thiab kev nce nqi khoom lag luam ntawm cov tuam txhab, thiab kev nrhiav ntes thiab kev yuam tshem cov neeg nkag teb chaws tawm yam tsis txuag leej twg. 

Nqe Lus Proposition 50 tsis yog ib qho kev hloov pauv mus tas li rau California tej kev xaiv tsa, tab sis yog kev hais daws ncaj qha rau phav kas moos Republican txoj kev txeeb lub hwj chim uas tawm tswv yim los ntawm Yawg Tuam Thawj Kav Teb Chaws Trump thiab cov thawj coj hauv lav Texas, uas rov faib cov ciam dej ciam cheeb tsam nroog rau Kev Xaiv Tsa dua tshiab kom thiaj li tau txais tsib lub rooj zaum ntxiv hauv U.S. House of Representatives. 

Nqe Lus 50 yuav qhia txog cov ciam tshiab rau ntau lub cheeb tsam ntawm lav California 52 cheeb tsam xaiv tsa, uas yuav txwv txiav Republican tsib lub rooj zaum uas lav Texas tau faib tseg.Yog tias tau txais kev pom zoo, ces cov cheeb tsam xaiv tsa tshiab hauv lav California yuav muaj cai siv tau rau txoj kev xaiv tsa xyoo 2026, 2028, thiab 2030 nkaus xwb, tom qab ntawd qhov kev faib cheeb tsam xaiv tsa yuav raug thim rov qab mus rau lub lav pawg tub coj xwm saib xyuas kev faib cheeb tsam xaiv tsa ywj pheej tom qab kev txheeb suav niam txiv pej xeem xyoo 2030.Raws li cov ciam uas teev tseg no, ces phav kas moos Democrats yuav tuaj yeem tau txais txog 5 lub rooj zaum ntxiv hauv U.S. House of Representatives.Yog muaj neeg coob nyob rau hauv House, ces phav kas moos Democrats yuav tuaj yeem tawm tsam rov qab rau Trump thiab Republicans' MAGA txoj phiaj xwm tau. 

Txawm tias cov cheeb tsam tshiab hauv Texas yuav txo hwj chim ntawm cov neeg pov npav – tshwj xeeb tshaj mas yog cov neeg pov npav ntawm haiv neeg uas tsis yog neeg tawv dawb thiab cov neeg uas tau pov npav rau Kamala Harris hauv xyoo 2024 - thiab tau dhau los yam tsis muaj kev tawm tswv yim los ntawm niam txiv pej xeem, tab sis daim phiaj qhia chaw uas xav qhia rau California yog kos los yam tau txais kev tawm tswv yim los ntawm niam txiv pej xeem, thiab thaum kawg los kuj yog cia cov neeg pov npav ua tus los muab kev pom zoo.

Vim li cas kev pov npav tias YES (YOG) rau Nqe Lus Proposition 50 thiaj li tseem ceeb

• Trump tuaj yeem ua tiav ntau yam ntawm nws txoj phiaj xwm lawm vim yog tsoom fwv uas tswj kav tam sim no yog cov uas muaj neeg coob zog me ntsis nyob rau hauv U.S. House of Representatives (219-213 leeg, nrog rau ib tug neeg sawv cev hauv phav kas moos Democratic uas nyuam qhuav xaiv tsa tau tshiab hauv Arizona uas tseem tab tom tos yuav los zaum rooj, thiab tseem tshuav ob lub rooj tsis tau muaj neeg zaum) thiab Senate (51-49 leeg), uas tau tsis kam tshuaj xyuas nws lub hwj chim.
• Thaum Lub Xya Hlis Ntuj, Trump tau siv phav kas moos Republican House thiab Senate uas coob zog me ntsis no los muab kev pom zoo rau tsoom fwv teb chaws txoj phiaj xwm kev siv nyiaj txiag uas yuav txiav cov nyiaj pab rau kev kho mob rau 15 lab leej neeg, txiav cov nyiaj pab them nqi xauj tsev ntau dua ib nrab, nce tus nqi qiv nyiaj rau cov tub ntxhais kawm thaj tsam li 43 lab tus tub ntxhais kawm uas qiv nyiaj, txiav pob nyiaj pab rau Planned Parenthood, thiab ntau yam ntxiv – tag nrho txhua yam no yog txhawm rau coj mus them rau kev txiav se rau cov tuam txhab thiab cov neeg muaj thiab tau nce ntxiv peb npaug rau pob nyiaj siv rau kev nrhiav ntes cov neeg nkag teb chaws tawm yam tsis yog tib neeg.Tag nrho txhua yam no yeej yog yam uas ua yam tsis haum cov tib neeg lub siab, muaj txog 2 ntawm 3 leeg yeej tawm tsam txoj phiaj xwm kev siv nyiaj tshiab no, uas yog lub laj thawj uas ua rau Trump thiab MAGA Republicans tab tom ua tiag yuav nrhiav txoj hau kev los txhav qhov kev xaiv tsa nruab nrab kom ua rau Republicans muaj yeej.Rov qab qees, House thiab Senate Democrats twb yeej tau sau tsab cai uas yuav nthuav dav Medicare los muab kev tuav pov hwm kev kho mob rau txhua tus neeg Meskas, muab nyiaj pab ntau dua qub rau kom yuav taus vaj tsev nyob, ua kom cov tsev kawm ntawv qib siab thiab tsev kawm ntawv university zej tsoom cia kawm ntawv dawb, tiv thaiv kev kaus me nyuam tawm hauv thoob teb chaws, thiab muab txoj hau kev rau kev ua xam xaj – txhua yam no yuav tsis tuaj yeem dhau tau yog tias Republican tseem muaj neeg coob dua.
• Tam sim no lav California muaj cov neeg sawv cev los ntawm phav kas moos Democrats 43 leeg thiab phav kas moos Republicans 9 leeg hauv the House, thiab Democrats 2 leeg hauv Senate.Tag nrho phav kas moos Republicans cuaj leeg puav leej tau pov npav pom zoo rau tsoom hwv teb chaws txoj phiaj xwm kev siv nyiaj, thiab Democrats txhua tus neeg tau pov npav tsis pom zoo.Yog tias cov neeg pov npav pom zoo rau Nqe Lus Proposition 50, ces California cov neeg sawv cev hauv the House yuav tuaj yeem hloov mus ua phav kas moos Democrats 48 leej thiab Republicans 4 leeg, thiab yuav muaj neeg feem coob nyob rau hauv the House.
• Qhov kev xaiv tsa tshwj xeeb no qhov tseeb tiag ces yog kev tiv thaiv kev ywj pheej – kev tsav coj lub teb chaws ntawm cov niam txiv pej xeem California vim yog Trump thiab phav kas moos Republican cov thawj coj tau ua tiag yuav tshem tawm lub zog kev pov npav ntawm cov neeg pov npav Tawv Dub thiab Latino hauv lav Texas thiab lwm lub lav.Hauv cov lav xim liab, kev faib cov cheeb tsam xaiv tsa nyob rau tsib lub xyoos yog tau txais kev tsav coj los ntawm cov neeg tsim txoj cai lij choj fab kam nom kam tswv uas yeej tsis quav ntsej txog tsoom tib neeg lub siab ntshaw hlo li, tab sis hauv California, cov neeg pov npav yuav yog cov los txiav txim txog daim phiaj qhia chaw tshiab thiab txiav txim txog tias seb peb xav kom peb cov thawj coj sawv cev rau peb lub lav thiab lub teb chaws li cas.Thiab tom qab ntawd peb tuaj yeem tawm tsam yeej tej kev tawm tsam uas muaj cov neeg nplua nuj ua txha nqaj qaum txheem rau peb cov zej zog, peb pab pawg sib koom kom muaj kev nyab xeeb, thiab peb lub hnab nyiaj.

Kev Txhawb Nqa rau Nqe Lus Proposition 50:

• Kev pom zoo rau Nqe Lus Prop 50 yog tau txais kev txhawb nqa los ntawm Democrats thiab pab pawg nrhiav kev vam meej hauv California thiab hauv thoob teb chaws Democrats, suav nrog Yawg Qub Tuam Thawj Teb Chaws Barack Obama, Yawg Qub Attorney General thiab tus tuam thawj coj ntawm National Democratic Redistricting Committee Eric Holder, U.S. Senator Bernie Sanders, U.S. Senator Elizabeth Warren, thiab Rep.Alexandria Ocasio-Cortez.
• Cov pab pawg thiab cov thawj coj hauv California, xws li Courage California, SEIU California, California Labor Federation, California Teachers Association, Planned Parenthood Affiliates of California, California Working Families Party, thiab cov koom haum uas ua hauj lwm txog Kev Txheeb Suav Niam Txiv Pej Xeem thiab kev rov qab faib cheeb tsam kev xaiv tsa dua tshiab hauv xyoo 2020, xws li Inland Empire United thiab Communities for a New California Action Fund.
• Cov neeg txhawb nqa Nqe Lus Proposition yeej muaj kev nkag siab tias nws yog ib qho kev daws teeb meem ib vuag xwb thiab qhov kev rov faib cheeb tsam dua tshiab no yuav raug thim rov qab mus rau pawg tub coj xwm saib xyuas kev faib cheeb tsam xaiv tsa ywj pheej hauv xyoo 2030.
• Pawg tub coj xwm saib xyuas tus tuas kev pov npav rau Stop Election Rigging Response Act (Tsab Cai Hais Txog Kev Hais Daws Kev Txhav Kom Muaj Yeej Kev Xaiv Tsa) ntawm Yawg Thawj Tswv Lav Newsom uas txhawb nqa Nqe Lus Prop 50 tau thov tau nyiaj ntau dua $95 lab, nrog rau tau txais nyiaj koom tuaj ntawm Yawg Thawj Tswv Lav Newsom pawg tub coj xwm saib xyuas kev nqua hu pov npav, Fund for Policy Reform, House Majority PAC, GiveGreen United Action, lub Democratic Governors Association, cov koom haum neeg ua dag ua zog suav nrog California Teachers Association, SEIU California, thiab California Labor Federation, cov thawj coj ntawm ntau yam lag luam thiab thev naus laus zis thiab lwm tus neeg pab nyiaj ntiag tug. 

Kev Tsis Pom Zoo rau Nqe Lus Proposition 50: 

• Kev tsis pom zoo rau Nqe Lus Prop 50 yog tau txais kev txhawb nqa los ntawm phav kas moos Republicans hauv California thiab hauv thoob teb chaws, uas muaj qee leej tau pab teeb tsa pawg tub coj xwm saib xyuas kev faib cheeb tsam xaiv tsa ywj pheej, xws li qub Yawg Thawj Tswv Lav Arnold Schwarzenegger thiab tus neeg pab nyiaj ntau rau phav kas moos Republican Yawg Charles Munger Jr.
• Phav kas moos Republicans thiab phav koos kas Democrats hauv ntau lub lav tau nthuav qhia txog kev tsis pom zoo los sis kev xoom xaim txog Nqe Lus Proposition 50, nrog rau muaj kev txhawj xeeb txog tias kev rov faib cheeb tsam xaiv tsa dua hauv tsib lub xyoos yuav muaj feem cuam tshuam rau thoob plaws lub teb chaws thiab ncua sij hawm ntev li cas.
• Munger – uas tau txhawb nqa Republican cov neeg sib tw, cov chaw tiv thaiv kev kaus me nyuam, thiab cov pab pawg tiv thaiv LBGTQ+ – tau teeb tsa pawg tub coj xwm Xub Tiv Thaiv Cov Neeg Pov Npav Ua Ntej thiab yog tus neeg pab nyiaj txiag tseem ceeb rau pawg tub coj xwm, tau cog lus tias yuav pab $20 lab los tawm tsam Nqe Lus Prop 50.
• Muaj ntau pab pawg uas tawm tsam Nqe Lus Prop 50 uas tau sib pab nyiaj tau ntau dua $45 lab, suav nrog cov uas tsav coj thiab pab nyiaj txiag los ntawm phav kas moos Republican tus qub House Speaker Kevin McCarthy, California tus qub Thawj Coj Republican Party Jessica Millan Patterson, lub Congressional Leadership Fund, thiab ntau tus tswv cuab Congress ntawm Republican hauv California uas lawv cheeb tsam yuav muaj kev sib tw ntau tshaj qub dua yog tias Nqe Lus Prop 50 tau txais kev pom zoo.

Cov Ntaub Ntawv Qhia Uas Tsis Muaj Tseeb txog Nqe Lus Proposition 50:

• Kev rov faib cheeb tsam xaiv tsa tsib lub xyoos hauv California yog nyob rau hauv cov neeg pov npav txhais tes thiab TSIS tsim kev phom sij rau peb txoj kev ywj pheej thiab kev xaiv tsa yam ncaj ncees – qhov kev phom sij tseeb tiag ces yog yawg tuaj thawj tswj lub teb chaws txoj kev tawm tsam peb lub nroog thiab cov zej zog, rhuav tshem cov khoos kas thiab cov kev pab cuam uas peb txhua tus vam khom, thiab txib kom cov thawj coj Republican hauv lub lav cia li txhav kom muaj yeej hauv lawv txoj kev xaiv tsa yam tsis muaj kev tawm tswv yim los ntawm cov neeg pov npav.
• Nqe Lus Proposition 50 yeej TSIS rhuav tshem los sis tawm tsam California Pawg Tub Coj Xwm Saib Xyuas Kev Rov Faib Cheeb Tsam Xaiv Tsa Dua Raws Cov Niam Txiv Pej Xeem uas muaj kev ywj pheej.Txoj cai kev pov npav yeej cia cov neeg pov npav tuaj yeem xaiv seb puas yuav lees txais los sis tsis lees txais daim phiaj qhia chaw xaiv tsa tshiab thiab siv ib vuag no kom txog rau thaum pawg tub coj xwm saib xyuas yuav rov qab los faib cheeb tsam xaiv tsa dua raws nws lub sij hawm li ib txwm tom qab kev txheeb suav niam txiv pej xeem xyoo 2030.
• Daim phiaj qhia chaw uas muab los no yeej TSIS tau zais tsis pub lwm tus paub.Lub lav feem saib xyuas kev tsim kev cai lij choj tau tshaj tawm cov phiaj qhia chaw uas tuaj yeem kom swb mus los tau, qhib cov rooj sib tham los mloog niam txiv pej xeem cov lus pom, thiab zoo siab tos txais niam txiv pej xeem tej lus xam pom rau daim phiaj qhia chaw ua ntej lawv yuav muab Nqe Lus Proposition 50 tso rau daim npav xaiv tsa thaum Lub Yim Hlis Ntuj.Cov neeg pov npav yog cov txiav txim siab qib kawg txog peb daim phiaj qhia chaw rau kev xaiv tsa.Tsis muaj ib lub lav twg uas phav kas moos Republican ua thawj coj uas tab tom ntsuam xav txog kev rov faib cheeb tsam xaiv tsa dua hauv tsib lub xyoos yuav muab lub hwv tsam rau nws cov neeg pov npav los tawm lus xam pom rau cov phiaj qhia chaw tshiab.
• Cov ntawv tseb qhia kom nkag ssiab yuam kev txog Kev Tsis Pom Zoo rau Nqe Lus Prop 50 yeej hais txog ntau lo lus hais los ntawm cov koom haum uas txhawb nqa kev hloov kho kev xaiv tsa thiab cov neeg pov npav cov cai, xws li California Common Cause thiab the League of Women Voters California.Tag nrho ob lub koom haum no yeej tsis tawm tsam Nqe Lus Proposition 50 hlo li.Qhov tseeb tiag, Common Cause yeej tau txiav txim tias California txoj cai pov npav rau kev rov faib cheeb tsam kev xaiv tsa dua yog ua tau raws li txoj cai hais txog kev ncaj ncees lawm, tab sis Texas ua tsis tau.

Cov Hnub Tim Rau Kev Xaiv Tsa Tshwj Xeeb Tseem Ceeb

Hnub kawg nkaus rau kev sau npe pov npav: Lub Kaum Hlis Ntuj Tim 20, 2025

Rau cov niam txiv pej xeem muaj cai tsim nyog uas tsis tuaj yeem teev npe ncav raws li lub sij hawm kawg, ces tuaj yeem mus siv Qhov Kev Sau Npe Pov Npav Nyob Rau Hnub Pov Npav Kiag tau ntawm lub nroog cov chaw hauj lwm saib xyuas kev xaiv tsa, cov chaw soj ntsuam, los sis cov chaw pov npav.

Txhua tus neeg pov npav hauv California yuav tau txais daim npav xaiv tsa xa raws lub chaw xa ntawv pais xab nis los ntawm koj lub nroog cov chaw hauj lwm saib xyuas kev xaiv tsa pib txij li Lub Kaum Hlis Ntuj Tim 6, 2025

Muab koj daim npav xaiv tsa uas xa raws lub chaw xa ntawv pais xab nis xa rov qab raw tsev pais xab nis mus, mus xa rau ntawm qhov chaw txais cov npav xaiv tsa, los sis lub chaw hauj lwm saib xyuas kev xaiv tsa hauv koj lub nroog.

• Cov chaw txais npav xaiv tsa yuav qhib rau Lub Kaum Hlis Ntuj Tim 7
• Cov chaw pov ntawv xaiv tsa yuav qhib rau kev pov npav tim ntsej tim muag ua ntej txog caij hauv cov nroog uas ua raws li Tsab Cai Hais Txog Cov Neeg Pov Npav Txoj Kev Xaiv pib txij li Lub Kaum Hlis Ntuj Tim 25
• Cov ntawv pov npav uas xa hauv pais xab nis tuaj yuav tsum tau ntaus lub thwj pais xab nis nyob rau Hnub Xaiv Tsa los sis ua ntej ntawd thiab yuav tsum tau txais tsis pub dhau Lub Kaum Ib Hlis Tim 12 txhawm rau coj los suav.Xa koj daim ntawv npav xaiv tsa kom ntxov kom thiaj li raug coj mus suav!

Mus rau Koj Lub Hwj Chim yog Koj Txoj Kev Pov Npav txhawm rau sau npe pov npav, tshuaj xyuas koj qhov kev teev npe pov npav, thiab sau npe txais kev ceeb toom txog kev xaiv tsa. Sau npe los soj taug qab koj daim ntawv pov npav ncaj qha los ntawm BallotTrax ntawm California Tus Lwm Thawj Kav Xeev.  

>> Xyuas kom ntseeg tau tias koj yeej tau sau npe pov npav lawm, thiab xa koj qhov kev pov npav tias Yes (Yog) rau ntawm Nqe Lus Proposition 50 rov qab tsis pub dhau Lub Kaum Ib Hlis Ntuj Tim 4, 2025! <<